الاهلى و الزمالك 3-3 (16/4/2010)

الاهلى و الزمالك 3-3 (16/4/2010)

الماتش ده بجد كان من احلا الماتشات اللى شفتها فى كرة القدم فى مصر وان كان ذلك مجازا لما يلعبه الاهلى او الزمالك من كورة و اقدم اعتذارى لكرة القدم على ذلك الغلط المقصود

لان اللى يتفرج على ماتش كورة قدم بجد هيعرف يعنى ايه كرة قدم و يعرف ايه اللى بنتفرج عليه هنا فى مصر

ما علينا

المهم اتفرجت على الماتش و بجد عجبنى جدا الماتش مش عشان اللعب و العياذو بالله ولكن للحماس بين الفرقتين و الاصرار على المكسب و الذى كان ظاهر للجميع من التصرفات التى رايتها فى الماتش

مش كدة و بس لانى كنت بتفرج على حكم المبارة الذى خرج بالمبارة الى بر الامان مش زى الحكام بتوعنا اللى مبيخرجوش بيها من البحر الى بر الامان و بيغرقوا ولو عرفوا يخروجوا بيمسكهم القراصنة الصوماليين و يطلعوا عنيهم واقصد بالقراصنة هنا الاعلام من نقاد و صحفيين و معلقين و مقدمين برامج و مش كدة وبس و الاجهزة الفنية و ضيف على ده كله (مية) حد يسألنى مين (مية) ده واحد ممكن نقول عليه شحات او متسول او متشرد او اى حاجة تطلق على واحد بيلف طول النهار عشان يشحت شلن بجد ميعرفش اللى جملتان (هات شلن)و(الزمالك مية مية) ولذلك اطلق عليه مية

ما علينا

المهم ان الحكم ده انا كنت بتفرج على الماتش التاريخى منذ اسابيع قليلة بين الارسنال الانجليزى و برشلونة الاسبانى فى الدور ربع النهائى فى لقاء الذهاب على ارض الارسنال و انتهى الماتش 2-2 فى ماتش اقل ما يقال عليه انه تاريخى بجد اتبسط ان يكون الحكم ده اللى هيحكم الماتش القادم بين الاهلى و الزمالك حتى لا يكون هناك حجج كالعادة ان الحكم ده ميوله اهلاوية او زملكاوية او بوليفيا

ما علينا

المهم ان اضيقت كتير من الكلام الكتير اللى بيتقال على بركات انه جاب الجون و بعد كدة راح على جماهير الزمالك و عملهم حركة موشينة و الكلام ده مش هيسكت عنه نادى الزمالك و هييقدم لاتحاد الكورة المستندات و السى ديه اللى بيثبت ما قام به اللاعب فى حق جمهور نادى الزمالك طبعا الكلام كلام فاضى لان ولا اللاعب عمل حاجة ولا فى مستندات تتقدم ولا سى دي انا شفت الحتة اللى نادى الزمالك و مسئوليه ولا (اعنى كل مسئوليه) اللى بيشتكوا بركات فيها اكتر من 10 مرات ولم اجد اى اشارة لجماهير نادى الزمالك لانه اصلا مرحش عندهم وبعد الجول جرى على جماهير الاهلى يبقى ازاى عملهم حركة موشينة

ما علينا

المهم ان الحجة ديه يمكن تهداء جماهير الزمالك من جهة الادارة لانهم المسئولين عن ضياع كل البطولات من نادى الزمالك وهنا لا اقصد حسام حسن لانه جاء بعد ان خربت مالطة بس الادارة اللى جابته موجودة من اول الموسم ولم تقدم شئ للنادى وان كنت اعيب على حسام حسن افعاله العفوية التى تصدر منه على الهواء ليثبت حبه و ولاءه لنادى الزمالك و جماهيره و كانه يضع امام عينه يوم خروجه من النادى الاهلى بلا رجعة هو و تؤامه ابراهيم والذى كان فى ذك الوقت على ما اذكر بسبب ابراهيم لان النادى الاهلى رفض ان يجدد العقد الخاص يأبراهيم حسن و تجديد لحسام فرفض حسام فقام صالح سليم برفض طلب حسام باستمرار التؤام معنا فى الاهلى وذلك بسبب سوء اخلاق ابراهيم اخيه و كثرة ايقافاته

ما علينا

المهم الماتش خلص و الناس روحت و اللعيبة قبضوا المكافأت و احنا خدنا الصبونة و ضيعنا اشغلنا

شالوا الدو و حتو شاهين ورجعوا شالوا شاهين و حتو حسام و ربنا يستر على اللى جاى

I'm reading: الاهلى و الزمالك 3-3 (16/4/2010)

يوميات العبد لله

يوميات العبد لله

 

    
اسهل و اوفر و اسرع طريقة لاشهار موقعك

I'm reading: يوميات العبد لله

قائمة منقولات

ان شاء الله سوف اتحدث هذة المرة باللغة العامية الفصحة وهى اللغة العربية التى نعرفها و لكن قد يطرق عليها بعض الكلمات العامية و التى سوف يتم توضيح بعضها بين قوسين بعد الكلمة مباشرة .

و لذلك اسميتها اللغة العامية الفصحة



قائمة منقولات
قائمة المنقولات هى تلك الورقة اللى بتتكتب على العريس عشان تحفظ حق العروسة طب و هو العريس لازم يكتب ورقة على نفسه عشان يثبت حق العروسة لديه و لو افترضنا انها مهمة عشان لا قدر الله لو حصل اى مشكلة بين الطرفين و قررا الانفصال و الطلاق فهل للعروسة كل ما احضرت هى و احضر هو طب يرضى مين ده انا لا اتدخل ولا اعترض على اى شئ شرعه الله للمسلمين واقول المسلمين وانا واحد منهم لانى عرفت ان الاخوة المسحين لا يكتبون تلك القائمة المزعزمة.
ما علينا المهم فى الموضوع ان القائمة كدة كدة بتتكتب على العريس الا من رحم ربك المهم ايه بقى اللى بيتكتب فى القائمة و طريقة كتابتها, ولنا هنا بعض التصورات التى قد تحدث و حدثت بالفعل اثناء كتابة تلك القائمة
فبعض تلك الاحداث ان تشرع هذه القائمة فى عمل فتنة بين اهل العريس و اهل العروسة و مش عايز اقولكم لما بتحصل مشاكل و تتدخل الاهل ايه اللى بيحصل عشان يوم تانى ف يومياتى محتاج مش يوم بس محتاج شهووووووور نتكلم فيه المهم ما علينا اول ما تبدأ المشكلة تجد السيدات اول من يتطوع لتسخين الجو


ام العروسة : هو مش عارف هو واخد بنت مين ده واخد سيت سته . هى القايمة اللى احنا كتبنهالو ديه أيمة(قائمة) دا انا بنت اختى متجوزة من شهر و عريسها ماضى (وقع) على الايمة من غير ما يتكلم و كانت ب ميت الف جنيه (مائة الف جنيه) ده احنا جيبين حاجات لبنتنا عمر ما اهله شفوها.

وهنا بقا (دخلنا فى الاعراض).

حد يقول ام العريس طب قالت ايه طبعا مش هتسكت.

ام العريس : بنت مين ديه؟ مش كفاية احنا لمناها و لقيت حد يرضا بيها , كانت مالها بنت خالتك مش انا قلت خد بنت خالتك اهى منا و عرفينها ثم بنتهم ديه ايه اللى نمضى على ايمة ليها بميت الف جنيه دا هى كلها متسواش ميت جنيه( 100 جنيه قصدها على العروسة).
طبعا ده كلام بيحصل مش على طول و مش مع كل الناس بس المهم انه ممكن يحصل و يكون بسبب تلك القائمة.
اخر كلامى ان القائمة و بعد استطلاع اراء بعض الناس


1- القائمة حق للزوجة بس متكونش مبالغ فيها يعنى مش نكت يجى خمسين طقم كاسات و عشرين طقم فناجين و عشرة طقم ماجات و حاجات زى كدة ملهاش لزمة الا انها ترفع لرقم بتاع القائمة


2- القائمة تأمين للزوجة لا دائما فى حالة الانفصال لا قدر الله فأنها اكثر الخاسرين لان زواجها مرة اخرى قد يكون صعبااو مستحيل خصوصا اذا كانت لديها اولاد.


3- القائمة ربطة للزوج حتى لا يفكر فى حاجتين الاولى انه هيخسر كل حاجة لو فكر فى الانفصال ده طبعا لو عنده اطفال لانه هيخسر الشقة قبل كل اللى فيها تانى حاجة انه ميفكرش يعمل كدة تانى و يتجوز تانى على مراته لانه مش هيلاقى تانى فلوس يجيب بيها حاجات جديدة تتكتب فى القائمة للزوجة الثانية


4- القائمة وسيلة للتباهى و المنظرة بين الاسر و العائلات فكل ما بيزيد رقم القائمة و قيمتها زادت الفشخرة

اخير و ليس اخرا اما حبيت بس اعترض على و ضع قائم فى مجتمعا ليس له اى فائدة

رسالة اخيرة لكل اب و لكل ام عندهم  بنت على وش جواز


ربنا يفرحكوا بيها و تفرحوا بولدها و بجوزها يكون سند ليكم ان شاء الله فى الدنيا و فى الاخرة فى الدنيا انه يربى احفادكم احسن تربية و يصون بنتكم و يعاملها احسن معاملة و فى الاخرة ديما يفتكركوا بالخير و يترحم عليكم و يقول الله يرحمك يا عمى على انك مطلبتش منى اى حاجة خارج عن طاقتى و يجزيكى يا حماتى يالى مسمعتش منك ولا مرة منك كلمة تسد النفس ده طبعا لو اشتريتوا راجل مشترتوش شوال فلوس او عجزتوه عشان لو حصل كدة هتندموا طول عمروكوا و اخرتكوا فى دونيتكم هيبهدل بنتكوا لانه حاسس انه اشتراها بالفلوس اللى دفعها فى مهرها و شبكتها و قيمتها اللى انتوا طلبتوا تكون بالشئ الفولانى


و كل شوية بنتكم غضبانة او زعلانة او مضروبة او احفدكم بيشتموكوا او مش حبينكوا لان باباهم بيقول عليكم كلام مش حلو و فى اخرتهم يدعى عليكم انه اتورط فى زواجة زى ديه و حاجات من كدة لا داعى ان اذكرها حفاظا على الزوق العام.


المهم ان الرسالة ديه حقيقية و انا شفتها بعنية فى الحالتين و اكيد كلنا شفناها فى حياتنا .


انا نفس تفكروا ان انكم عندكوا ابن و عايز يتجوز بنفس ظروف عاريس بنتكم اللى جاى يتجوز بنتكم هتعملوا ايه( افعل ما شئت فكما تدين تدان) .


ثم بالبدلدى كدة هو حضرتك او حضرتك لما جيتوا تتجوزا كان عندكوا نص اللى بتطلبوه من عريس بنتكم


يعنى حضرتك كان عندك غسالة فول اوتوماتيك عشرة كيلو مش هى يادوبك غسالة على الايد و على الواقف ده طبعا لو كان فى غسالة اصلا ولا تلاجة عشرين قدم و مش كدة كمان لازم نوفروست الله يرحم القولة بتاعت السيد قناوى انا مش قصدى اى تريقة ولا تجريح انا قصدى الواحد بس ممكن يبدا حياته باللى يقدر عليه و بعدين ربنا يكرمه و يجيب احسن من اللى طلبتوه منه

المهم ان بنتكم تكون مبسوطة فى حياتها ثم انتوا مش عايزين تشوفوا احفادكوا ولا ايه ده احب الولد ولد الولد

لما تجربوا الاحساس ده هتعرفوا معنى كلامى انا طبعا مجربتش بس على الاقل شوفت فرحة و حب جدتى ليا حب ما يتوصفش.

 انا خلصت خلاص .


ياريت يغير كلامى شئ فى نفوس الناس حتى لو شخص واحد فقط ساعتها انا هكون سعيد جدا لانى قدرت اغير شئ


على راى الاعلان بتاع القطارات تفتكر الكلام ده هيغير حاجة انا متأكد انه هيغير حاجة ان شاء الله
 
اسهل و اوفر و اسرع طريقة لاشهار موقعك

I'm reading: قائمة منقولات

يوميات العبد لله

بسم الله الرحمن الرحيم والصلاة و السلام على خير المرسلين سيدنا محمد و على اله و صحبه و سلم

 مما لاريب فيه ان الكتابة او التدوين من الاشياء التى قد تجعل الانسان يريح نفسه من اعباء قد تقع عليهاومما لا ريب فيه ايضاً انك تجد من يسمعك او يتفاعل مع كتاباتك فقد يشعرك هذا بالارتياح ايضاًفأنا قررت ان اخوض تجربة الانترنت فى الكتابة و التعبير عما اشعر به من مشاعر متباينة فى بعض الاوقات سعادة و الوقت الاخر حزن وأكتئاب و احيان اخرى فرح و سرور كلنا قد نعيش تلك الفترات من العمر التى تمر علينا باكثر من شكل فى اليوم الواحد وانا الان قررت ان اكتب و اعبر عن ما يسير فى يومى و اجد ما اكتبه عنه فمنذ مدة كبيرة و انا ارغب فى الكتابة و لكن كلما هممت ان اكتب وجدت نفسى لا استطيع الكتابة فانا لا اجد ما اكتب و ما يستحق ذلك و لكن و بعد ان جربت التدوين مسبقا فى احدى المدونات وو جدت تفاعل من بعض الاعضاء مما كتبت فأنا الان قررت ان ابداء فى انشاء مدونة ترصد مدونات ليومياتى انا و اسميتها يوميات العبد لله وذلك اقتباسا لعنوان واحد من اهم الكتب التى قرأتها للكاتب الساخر محمود السعدنى( يوميات العبد لله)و بما اننا كلنا عباد الله فقررت ان اكون انا عبد الله فى تلك المدونة التى يكتب يومياته.سأحاول اكتب و كانى اتحدث اليك انت اخى القارئ و اتمنى ان افيدك و استفيد منك .سأكتب عن كل شئ عن الحب و العلم و السياسة و الكورة و الاحداث الاخيرة المحلية و العربية و العالمية.قد تكون بعض الكتابات بطريقة ساخرة , حدا ما او تكون كتابات لطيفة, او مواقف مرحة , و قد تكون ذات مضمون واضح او مضمون مستور , و قد تكون بلا مضمون اصلا , و لكن بين السطور هو الجزء المستهدف دائما , فانا سوف احاول استغلال بين السطور اكثر من فوقها وهذا ليس بخلا او محاولة للتوفير ولكن ليكون الكلام لجميع الناس من يجيد القراءة من على السطور و من يجيدها بين السطور.لن اطيل ولكن ما احب ان اقوله اخيرا
من الصعب ان تجد من يسمعك او يفهمك كما تريد ولكن من السهل ان تكتب و تقول ما تريد حتى تجد من يقرأ و يستفيدموعدنا فى اول اليوميات ان شاء الله. 
اسهل و اوفر و اسرع طريقة لاشهار موقعك

I'm reading: يوميات العبد لله

tadwina-50440507-tadwina

tadwina-50440507-tadwina 
اسهل و اوفر و اسرع طريقة لاشهار موقعك

I'm reading: tadwina-50440507-tadwina