ده اوبشن جديد هتقدمه وزارة الكهرباء للمواطنين المصريين و سيتم تعميمه خلال شهور
الخدمة بأختصار هى:-
عمل كروت شحن للكهرباء مدفوعة مقدما سوف يتم استخدمها لتوصيل الكهرباء بمعنى انك هتشحن الكهرباء بكارت تشتريه و تشحن بيه العداد الخاص بالكهرباء و بعد ما يخلص كارت الشحن هتفصل الكهرباء و تقولك الموشرات فى العداد (لقد نفذ رصيدكم يرجى اعادة شحن العداد تيت تيت تيت )
ولازم تنزل تشترى كارت شحن للنور عشان العداد يشتغل و هكذا
يعنى اللى هيدفع مقدم بس اللى هينور غير كدة مفيش نور لحد
على فكرة الكلام بجد
و الخبر ده كان لسة نازل فى مصراوى الصبح
على العموم
اعتقد انه لازم يكون فيه خدمات زى بتاعت شركات الموبيلات يعنى مثلا:-
1-كهربنى شكرا...... وديه لما الواحد الكارت بتاعه يخلص و الدنيا تضلم عنده واحد يبعتلو كارت شحن
2- كهربنى على الهوا او على الطاير ..... وديه لما الواحد يكون فى حتة مفهاش كروت شحن و احد تانى يبعتلو الشحن مباشرة على العداد
3- سرقنى شكرا......وديه بقا عشان العالم اللى غاوية سرقة الكهرباء يضيفوا بس نجمة قبل رقم عداد حد من جرانهم و يوصلوا الكهرباء
و لمزيد من الاقتراحات يرجى التواصل الى كل الخدمات المطلوبة لتوصيلها مجمعة الى وزارة الاتصالات قصدى الكهرباء لمناقشتها قبل عرض الخدمة فى الاسواق المصرية
مستنيين اقتراحتكم لخدمات جديدة
معلش يا جماعة اصل لازم اقفل دلوقتى اصل مش باقى معايا غير بنص جنيه كهرباء هتفرج بها على ماتش الاهلى و الاتحاد الليبى
بالليل
س
ل
ا
م
معلش الكهرباء بتقطع عندى اصل الكهرباء عندى ضعيفة هشوف حتة تكون الكهرباء فيها قوية وارجع اكهربكوا قصدى اكلمكوا
اسهل و اوفر و اسرع طريقة لاشهار موقعك
0 التعليقات:
إرسال تعليق
على فكرة انا ديموقراطى جدا انا هسمح باى تعليق على اليوم ده بس اللى فيها شكر او تعقيب فقط انما اللى فيها اعتراض فمن الاحسن ان تدخر ذلك لنفسك وان تنضم الى قائمة الموافقووووون فقط و ذلك لمصلحتك
وهى ديه الديموقراطية اللى احنا اتعلمناها هنا فى بلدنا الحبيبة
التعليق متاح للجميع سواء بالموافقة او الاعتراض و ذلك حتى لا يفهم احد غلط